Israelis do not enter !

لو كانت حكومتى ترحب بك فى بلدى
فانا لا ارحب بك فى مدونتى

if you are welcomed in my country cause of my government..
still you aren't welcomed in my blog.

I had a dream about you last night !

اصعب حلم هو ما لا تستطيع ان ترويه لمن تريد ان يعلم به
وتعلم جيدا انه سيسعد به هو الاخر
ولكنك فقط لا تستطيع ان تخبره

وجية عزيز مش ناقص حاجة !1

بعد ما سمعت شريط وجية الجديد (ناقص حتة)1 حسيت بسعادة غريبة ..غريبة عشان الشريط معظمة من النوع اللى بيوجع كعادة وجية بس حسيت بالسعاده لانى كنت فعلا محتاج اغانى زى دى تملا الفراغ الروحى اللى بقى فيا الفترة اللى فاتت ..مش هتكلم على اللحان وجية او المزيكا السحرية اللى معمولة ..ولا كلمات على سلامة ومجدى نجيب ..مش عارف هو فاضل ايه اتكلم عليه .. بس مهما اتكلمت مش هعرف اوصف اعجابى بالشريط

ابتدى وجية البومه باغنية بسيطة على اذن المستمع العادى مالناش غير بعض عشان يكسب مستمع ..مزيكا سمبل وكلمات سمبل من غير رمز ومن غير ما ينزل فى المستوى ..1

ناقص حتة اغنية اكثر من روعة بالنسبه للحن والكلمات واللى مش عارف احدد دى كلمات على سلامة ولا مجدى نجيب .. عبقرية فظيعة الاغنية دى

حاجات و محتاجات بتوصف حالتى الشخصية دلوقتى وشكلى هروح اقولها دلوقتى واريح نفسى يا وجية يا روح ما بعدك روح وعلى رأى كتكوت مدام اكده ميت واكده ميت انا هخاف من ايه ؟؟ بس خايف نرجع نقول يا ريت !!1

عم سالم المصرى اللى بيدور على ادميته ..بيشكى بداله وجيه فى الاغنيه دى ..ومين اللى ظالم ؟؟

يمكن اضحك .. لا تعليق

عيرة اى والله يا وجية عيرة كلة اصبح عيرة

من حقنا بس هى مش كده فعلا ..بس بردوا مش هنبطل نحلم ..الاغنية دى روعة ..1

بعدين دى الاغنية المفضلة ليا فى الشريط كلة ..تحس كده انها على نهج اغنية
comme d'habitude
بس بطريقة مختلفه طبعا ..مش عارف العلاقة دى جت منين بس مش عارف هى ركبت معايا كده

متجرحوش الورد .. قال يعنى هو ناقص

المرايا .. رسم جميل لحالة ..تحفة

ساعات المطر ..الكلمات دى معانيها جميل قوى ..والمزيكا جامدة

وفى الاخر احب اشكر وجية على الابوم الروعة ده ومبروك على محبى وجيه الابوم الجديد ..الواحد كان عطشان لاغانى زى دى .. 1

Help !

مالك يا طير طنان
خارج كدا من السرب
سيبتك من الاغصان
!help وماسكلى كلمة

وسط البلد

والله ما عارف اكتب اقول ايه .. بس مش عارف عندى احساس انى لازم ..لازم اكتب .. بقالى كتيييير مبوستش اى بوست ومحدش يفهم مبوستش دى غلط ..ده اكسيبرشن جديد .. ما علينا فكرنى الكليب اللى فى الاخر ده بوسط البلد لفريق وسط البلد فى اغنية وسط البلد طبيعى جدا انوا يفكرنى يعنى ..وبالاخص بافتر 8 عمرو النحراوى هو اللى يقدر يتكلم عليها اكتر منى .. بعدين .. الكليب متصور اغلبه فى افتر 8 وسعد الحرامى منور الكليب .. مهو علامة مميزة هناك .. وسط البلد فعلا بقت علامه فى عمرنا .. لولا الانشغال والكسل والحر كان زمنا بقينا هناك كل يوم فى افتر 8 تحديدا ..نتكلم ونلعب ايستماشن ونحلم ..ونتكلم على حال الدنيا ..منلهاش دعوة باو تى فى .. ونكلم على مصر والناس اللى عايشين فى مصر واللى بيحصل للمجتمع المصرى ..وسلبيات المجتمع المصرى .. والمواقف اللى بتحصلنا من المجتمع المصرى .. و و و .. بس النتيجة بتطلع دايما ان مصر وحشة .. ولازم نسيبها ونهج .. صح ..احنا لازم نقتنع ان مصر وحشة بدون شعارات وكلام فاضى .. وبحبها وبلدى والكلام ده كله .. احنا لازم نقتنع ان هى وحشه عشان تبقى احسن سيبكوا من الرغى ده كلوا .. خلينا فى الكليب

يمكن

Download

تامر حسنى مبارك

مش غريب طبعا تامر حسنى يطلع واطى
ويبقى فخور بكدة
ويغنى للوطينة كمان

تامر حسنى بيقولك ايه بقى :

اعتذرى للى هيجى بعدى
خليه يسامحنى اصل انا
اخدت كل حاجة فى عهدى
وشوفى عهدى كان كام سنة


فتشاء الظروف ان الكلام ده بينطبق على تامر حسنى وحسنى مبارك
بس مش عارف اذا كان حسنى مبارك هيعتذر للى هيجى بعده
ولا ايه
ويا ترى هيسامحه ؟؟
اصل خد كل حاجة فى عهده
كل حاجة ..
حلبها من الاخر ..
وشوف عهده كان كام سنة بقى

اراهن كاتب الكلمات دى كان سندوتش الفول
بتاعه ملفوف فى احدى صحف المعارضة

فنحن نؤيد ونبايع تامر حسنى

عجايب

عجايب عجايب امرك عجايب
ده العمر سارب .. والعشق صايب
قرب وخد لك مـ الحظ نايب


تصرخ وتعلى
وتنزل وتطلع
وتنده حبايب
وتنده قرايب
وفى لحظة تنسى
تمل وتسها
ويطلع كلامك
مجرد كلام
مش كنت تصبر
حلمك يعمر
تعافر تحارب
تسكن مراكب
وابراج حمام


طيب هتمشى
هتبعد بعيد
وانسان جديد
يكبر ويعقل
واول ما يوصل
يقتل قتيل
كان ذنبه ايه ؟
كان حبه طايب
كان قلبه خايب

عجايب عجايب امرك عجايب
ده العمر سارب .. والعشق صايب
قرب وخد لك مـ الحظ نايب

عودة لفيروز بشراهة

النهاردة بالذات شىء غريب بيحصلى .. اليومين دول من اغرب ايام حياتى عموما ..بيحصل حاجات مش لاقيلها معنى .. يمكن يكون وصلت للتوب .. توب ايه مش عارف .. بس هيبقى كوكتيل توبات حاجات كتير .. حاسس انى باخد قرارات كتير .. وطريقه تفكيرى كلها بتتغير بطريقه عشؤية .. يعنى انهارده الصبح مثلا .. قررت وانا نايم فى السرير كده وسرحان فى حاجة كنت بكتبها .. انى هبطل تدخين !! الموضوع ده كان من ابعد الاحتمالات انوا يحصل معايا ..لانى بحب التدخين جدا .. بس حاسس انوا شىء مسيطر عليا بشكل بشع .. وانا مبحبش كده .. فانا قررت ابطل التدخين حتى لفترة كبيرة عشان احس انى اقدر اعمل كده فعلا وانى حر .. مسكت العلبة وطبقتها ورميتها من البلكونه ..

ومن الحاجات الغريبه اللى بتحصلى انهارده بردوا .. انى رجعت اسمع فيروز بشراهة ..زى ما يكون بطلت تدخين ورجعت لفيروز تانى ..بقالى كتير جدا مسمعتهاش كده .. عشان كنت بحاول ابعد عن الجو ده .. بس خلاص معفيش فايدة .. مش هحاول تانى ..1

إذاعة نفسية

كان نفسى اقول غنوتى ناعمة رومانسية .. طلع الكلام ناشف ... كاشف هموم فيا ..لا القلب نفس القلب ولا الحياة هى ..

اعزائى المستمعين .. نسكت حين .. ونسكن حين .. ونقتل بين الحين والحين .. يجى الكلام .. وفين يوجعك .. تصرخ ..ومين يسمعك .. ترمح فى الخلا .. ومين يرجعك ؟؟!! تنداه على نفسك .. متلقيش .. تتلم جوا توبك .. ميكفيش .. تنداه على حسك .. ميغنيش .. اعيش اعيش اعيش .. واموت مفيش ..1

لذكرى

القصيدة كتبت منذ سنة تقريبا ..
فهى هنا فقط لذكرى ايام احبها .. وليت لى حق التمنى فى عودتها ..1

الصبر اصله كان صاحبى
وكلامى كان يطلع يحبى
وقلبى كان طفل بيبكى
خاف يطير ينزل مكسور

ضميلى قلبى واروينى
من بحر حبك اسقينى
خليكى جنبى خلينى
اموت فى حبك اعيش منصور

صبرت واخرة صبرى ملاك
وعيون تقول مقدرش انساك
واغرق انا فى بحر هواك
ياخد بأيدى جناح عصفور

الريس فى باب الخلق

صباح الخير ..
انهارده الحد 25 فبراير 2007
الساعة 7:15 صباحا
انا طبعا ظابط المنبه اللى مبصحاش عليه .. كا العادة .. ونايم ومدفى وميت فل واربعتاشر ... عارفين طبعا ان اكيد اكيد انهاردة الريس جاى ..عشان الكلاب سبقته امبارح .. بعد ما قال انوا جاى بقالوا فترة وكل شوية يأجل.. والحلاق يقول اصل فى خطة لأغتيال الريس فى باب الخلق ! .. طبعا انا صاحى انهارده مش على صوت المنبه .. انا صاحى على صوت المدرعات اللى فى الشارع .. وصوت العساكر .. وصوت الظباط وهما بيكلموا بعضهم فى الهوكى توكى ..ما علينا .. احنا راكنين العربية تحت البيت .. طبعا لقيتهم بيبصلها ..وانا باصصلها .. قالولى انزل شيلها عشان هتتشال .. نزلت طبعا جرى اشيل العربيه ...عشان دول بقر.. انا طبعا مش شايف حاجة .. وعمال اتفرج على كمية الاسلحة وكمية العساكر .. وكمية الظباط وعلى كمية الرتب .. قولت يا رب ما يقفلوا الشارع اللى بيعدى منه الاوتوبيس بتاعى .. ونعرف نروح الكلية ونرجع بسلام .. المهم شيلت العربية .. وكل شويه اروح ابص عليها .. الاقى العساكر تزيد والناس بتشيل العربيات ولقيت بقى ظابط شكله من الحاجات الكبيره يعنى .. طويل وتخين ولابس بالطوا زى بتاع الماتركس .. وعمال يبص على العماره .. ومش عارف يطلع واحد هنا يبص .. ويجرى واحد هناك يشوف ايه النظام .. وعمال يتكلم مع ده وده والاقى بيبص على العمارة ويقول :المشكلة بقى فى الناس اللى ساكنين هنا .. قولت اه تصدق فعلا ولاد الكلب اللى ساكنين هنا دول انا لو منك اضربهم بالنار واريح نفسى .. عشان مش عايزين إزعاج والله ..

المشكلة ان انا صدرى قافش . ومعيش البخاخه عشان خلصت .. ومش عارف اشرب سجاير .. وصوت العربيات والسرينه اللى تحت هيفجروا دماغى الريس بقى جاى يتفرج على ايه .. المكتبة (دار الكتب ) والمتحف (متحف الفن الاسلامى ) بقالهم حوالى كده 8 سنين بيرمموا شوف 8 سنين ويادوبك المكتبة لسه مخلصينها من فترة والمتحف لسه مخلصهوش .. لك ان تتخيلوا كمية السرقة اللى حصلت فى الترميم ده ..

جاى هو بقى يتفرج على ايه ؟؟ مش فاهم انا الصراحه .. يعنى موقف حال الناس .. والمحلات .. وقافل الشارع وعامل قلق على تلت ساعة يجيى يخدلوا نظرة سريعة على السرقة اللى حصلت فى الترميم .. وانهم خلاص بطلوا سرقة وخلصت البقرة الى بيحلبوا منها ويجيى يشوف اخر الانجازات والطبيخ اللى تحت ولايته !!



ريحوا بقى يا رب من المشاوير دى !!1

مفترق الطريق

الاغنية دى ... مش قادر اقول انا بحبها قد ايه ..

من اجمل كلمات صلاح جاهين غنتها ماجدة الرومى فى فيلم عودة الابن الضال

التسجيل ده بالذات هو اللى انا بحبه ... ماجده بتغنيه بإحساس عالى جدا غير تسجيل الاستديوا والموجوده على مواقع كتير

وبشكر تامر سراج على تسجيل الاغنيه من الفيلم

للتنزيل

إذاعة غريبة

قول للغريب حضنك هنا .. دربك قريب من دربنا .. بيتك هنا .. اهلك هنا .. حزن البشر ده حزننا ..

قول للغريب فرجه قريب .. قول للغريب فجره قريب ..
قول للغريب بكره قريب .. قول للغريب بكره قريب
عالم صغير على قدنا ..


اعزائى المستمعين .. واحد م الملايين .. موجود فى كل مكان وفى كل حين .. بياناته ليها العجب .. ولا تنقرا ولا تنكتب .. الجنس : حزين .. مع ان بسمته تفرح العين .. السن : مسن .. مع ان عمره ميجيش العشريين .. الوظيفة : سارح فى الملكوت .. مع ان كل اللى حوليه بيوت .. اما عن اسمه وعنوانه .. غريب مع انه من هنا!!1

حـــامل الـــهوى

حـــــامل الــهوى تعــبُ - يـــستخفه الطــربُ

ان بـــكى يـــَحُقَّ لـه - لــــيس ما به لـعب

كلما انـقضى سـبب ـٌ منك عاد لي سبب

تعجبين من سقمي - صحتي هي العجب

تــــــضحكين لاهــيةً - والــــمحـب يـنتحب


للتنزيل

الناحية التانية

العمدة أجمع و أستجمع
هيأخد بإدينا يودّينا
الناحية التانية يعدّينا
و هيبقى عبور
ده عبورنا التاني ولامواخذة
واكتبى يا سطور
والناحية دى مالها يا عمدتنا
دى صبحت بور
بس احنا يا عمدة خلاص شيخنا
والناحية التانية بلا قافية
راح تبقى قبور
ابنى المتعلم متنور
راح يلبس توبي ويدور
مش لسه صغيّر ؟!!!
ده واد شطور
هنعلّق صورته فى الحارة
ونعلّق نور
ونطبّل له ونهلّل له
راح ياخد الدور
يا سلام يا سلام
ده ولا الافلام
ابن العمده يطلع عوّام
وسبكنا الدور

وكل عبور وانتم طيبين

غنيوة حلوة

اهلا ..

بما انى مدون جديد ... احب اهدى كل المدونين هذه الاغنية
ودى للأمانه التدوينيه سمعتها فى مدونة شباك
لفريق
Chehade Brotherse
من فلسطين

ما تعيش بقلبك حسرا


للتنزيل

هندون

اهلا بكم ...


ايه داخلة حمدى قنديل دى ..
ماعلينا ..

دى المدونة بتاعتى .. يا سلام ؟؟!!
اه والله ..
المدونة كانت معموله وجاهزة من زمان .. بس ظروف الحرب
قصدى الامتحانات والمذاكره والشيل والقعده منعتنى انى اكملها
وحتى بعد الفوقان شوية ..الواحد اعد كتير على ما قرر يرجع للعالم التانى من تانى
والكتابه عموما ..
واجهت كتير من المشاكل فى المدونه القديمة .. مش عارف معصلجة ومش راضيه تتغير ..
واتفرج على المدونات بتاعت الناس وانبهر بالحوارات اللى عاملينها ..
والصور والشعارات والفوتر وبلاوى وقولت انا لازم اتعلم .. وانا صغير يعنى
واكتشفت حاجة حلوة قوى انك لازم عشان تعمل اللى الناس بتعمله ده تكون بتفهم
HTML
وانا ولا اعرف اتش ولا مل
قولت خلاص مش لازم .. يمكن بعدين
بس نبتدى وخلاص
..........................

اعرفكم بأعزائى المستمعين ..
دى عبارة عن اذاعة .. (نفسى يبقى عندى اذاعة )
بذيع فيها اللى انا عايزه .. وبتبقى فى صورة زجل .
مقدمتها اغنية زى اى اذاعة بالظبط .. بدل الموسيقى يعنى
:)

بس كدة !!1

zoof